Transkription der Urkunde von 1384

Hannes van Boltesem, knape unde Henningh Vretholt verpfänden an Diderike Mummentey, Einwohner von Lüdersen, ihre fünf äcker in der Lüderser Feldmark an dem langen Felde für sieben Pfund Hannoverscher Pfennige. Helmich van Bennexen, Riddere mit Olemanne, Corde Ravens, Detharde Roden, Worme, Gerlaghe Hovemannes und Hermene Wilghen, besetene Buren to Bennexen bezeugen es.

    Ek Hannes van Boltesem, Knape, unde Henningh Vretholt bekenet openbare in {dessem} Breve de bezegheld is mit mineme
    Hanneses van Boltesem vorbenomt Inghezeghele des wy Beyde hir to bruket dat wy Diderike Mummenteyge to Ludersen
    eder deme de dessen Bref hedde, ane sine Wedersprake hebbet gheset unde vorpendet unde laten in sine Were use
    vif Ackere de se lighet uppe der Luderser Marke an dem langhen Velde, mit allem Rechte, Nut und Tobehoringhe
 5 vredeliken to brukende, vor seven pund honoverscher Penninghe des he us rede{li}ge geeven heft alsusdane Wis dat we
    eder use Erven desse vorbenomten vif Ackere nicht weder losen en moghet eder en scullet binnen dessen noghesten to kom-
    enden veer iaren. Wanne aver de veer iar ummekomen weren so moghe wy use vorbenomten Gud weder losen vor seven
    Pund des vorscrevenen Gheldes dest wi dat vore kundighen eder witlik don to Middensomere dar noghest bevoren
    wanne wi dat Gud to sente Micheles dar na weder kopen wolden. Were aver dat wi oder use Erven dat vorbenomte
10 Gud to sodaner Tid nicht ne loseden, so scol det vort an in der sulven Wise vorpendet bliven in veer iar alle
    de Wile wi use Land nicht ne loseden to sodanen Tiden alse vorscrewen is. Ok sculle we unde wilt des vorscrevenen Gudes rechte
    Warenden wesen wener, unde wanne des not is unde van us gheeschet wart. Alle desse vorbenomten Stücke lowe we vor us unde
    use Erven entrewen, stede, vast unde unvorbroken to holdenden ane Arghelist, Vortmer ek, Her Helmich van bennexen
    Riddere, bekenne ok in dessem sulven Breve, dat ek mit · Olemanne · Corde Ravens · Detharde Roden · Worme · Gher-
15 laghe Hovemannes unde mit Hermene Wilghen, besetenen Buren to Bennexen, hebbe gelovet unde love mit sa-
     mederhant entrewen dem vorbenomten Diderike Mummenteye unde deme, de dessen Bref hedde ane sine Wedersprake
     ift an ienich brok eder hinder scude, an alle dessen vorscrevenen Stucken eder an or ienegheme besunder
     unde darumme gemanet worden samet eder besunder, so scolde wy unde wolden dene Breke eder hinder
     binnen den ersten Verteynachten na der Maninghe degher unde al uprichten unde ervullen an Vortoch unde Hinder dat
20 hebbe wy gelovet unde lovet entrewen, stede, vast unde unbrekeliken -to holdende, unde ek, Her Helmich van Bennexen
     vorscrevene hebbe des to ener Betughinghe min Inghezeghel gehenkt van user aller Weghene in dessem
     Bref, de gegheven is na Goddes Bort dusend drehundert Jar an dem verden unde achtendighesten Jare des
     hilghe daghes sunte Michaheles. (Original - Pergament - Siegel fehlt).